मुंबई : किंमतीत दुप्पट वाढ नोंदवत इंडियन रेल्वे केटरिंग आणि टुरिझम कार्पोरेशन लिमिटेडच्या (आयआरसीटीसी) शेअरने सोमवारी शेअर बाजारात जोरदार प्रवेश केला. मुंबई शेअर बाजारात नोंदणी होताना ‘आयआरसीटीसी’च्या शेअरची किंमत ३२० रुपयांवरून ६४४ रुपये इतकी झाली. या आयपीओमध्ये गुंतवणूक करणाऱ्यांचे पैसे एका दिवसात दुप्पट झाले. गेल्या दोन वर्षांत कोणत्याही शेअरला नोंदणी (लिस्टिंग) होताना अशी वाढ मिळाली नव्हती.
‘आयआरसीटीसी’च्या ‘आयपीओ’मध्ये एका शेअरची किंमत ३१५ ते ३२० रुपये ठेवण्यात आली होती. शेअर बाजारात नोंदणी (लिस्टिंग) होताना, त्यात तब्बल १०१.२५ टक्के वाढ होऊन त्याची किंमत ६४४ रुपये झाली. त्यामुळे शेअर बाजारात ‘आयआरसीटीसी’ नोंदणीकृत झाल्यानंतर कंपनीचे भांडवल १० हजार ७३६ कोटी रुपये झाले आहे.
‘आयआरसीटीसी’चा आयपीओ ३० सप्टेंबर ते चार ऑक्टोबरदरम्यान खुला करण्यात आला होता. गुंतवणूकदारांनी याला प्रचंड प्रतिसाद दिला. ६३८ कोटी रुपये किंमतीच्या या आयपीओद्वारे साधारण दोन कोटी शेअर्स विक्रीसाठी खुले करण्यात आले होते. त्यासाठी तब्बल ११२ पट अधिक मागणी झाली. केंद्र सरकारने आपला १०० टक्के हिस्सा असलेल्या ‘आयआरसीटी’मधील १२ टक्के शेअर्स ‘आयपीओ’च्या माध्यमातून विक्रीस खुले केले.